Domingo. 03.07.2022
A partir do luns, Medio Rural ofrecerá charlas á poboación das parroquias de alta actividade incendiaria

NOTICIAS A LIMIA | Concienciación contra incendios en Guillamil (Rairiz) e dúas parroquias de Calvos de Randín

Parroquias de Alta Actividade Incendiaria na provincia de Ourense, segundo o PLADIGA 2022 (FILEminimizer)
Parroquias de alta actividade incendiaria na provincia de Ourense, segundo o PLADIGA 2022. | IMAXE: Pladiga.

Hai unhas semanas, o Plan de prevención e defensa contra os incendios forestais de Galicia (Pladiga 2022) sinalou as parroquias limiás de Guillamil (Rairiz de Veiga), onde o verán pasado se rexistrou un lume que puxo en risco á poboación, Santiago de Calvos e San Xoán de Randín (ambas no concello de Calvos de Randín) como zonas de alta actividade incendiaria. Agora, a Consellería de Medio Rural anuncia “unha actividade informativa no núcleo principal de cada unha das 35 parroquias de alta actividade incendiaria” do país.

A actividade consistirá en xornadas divulgativas en materia de prevención e defensa contra os incendios forestais e de autoprotección para a poboación rural. No Distrito XV, ademais das parroquias da comarca limiá, están sinaladas as da Fraga (Lobeira), Requiás (Muíños) e San Paio e Río Caldo (Lobios) na Baixa Limia. No Distrito XIV, ás máis próximas á Limia son as de Montes e San Millao (Cualedro) e Bousés (Oímbra). No norte, a de Requeixo, en Chandrexa.

“Estas charlas teñen como obxectivo principal o de concienciar e sensibilizar á poboación sobre os danos que ocasionan os incendios e os riscos que representan, tanto para as persoas como para os bens, tanto forestais como non forestais”, informa Medio Rural nun comunicado emitido este mércores. As sesión comezarán a impartirse desde o próximo luns, día 20, e terán unha duración aproximada de entre unha e dúas horas.

A consellería porá a disposición da cidadanía o teléfono 085 (de balde) para que se poida alertar de calquera lume do que se teña constancia “para que os efectivos do Servizo de prevención e extinción de incendios poidan chegar o antes posible e minimizar as consecuencias do lume”. 

O pasado luns, o conselleiro do Medio Rural, José González, xunto ao director xeral de Defensa do Monte, Manuel Rodríguez, visitaron o novo centro de coordinación provincial (CCP) e de distrito (CCD) no Servizo de Prevención de Incendios Forestais de Ourense. Medio Rural deu conta de que o acondicionamento destas instalacións supuxo un investimento superior aos 100.000 euros.

O Pladiga 2022 prevé que as torretas de vixilancia do Distrito XIV se manteñan no Penedo da Lebre (en Vilar de Barrio), no San Cibrao entre Rairiz e A Bola, en Pena Loba e no Viso (Lobeira). Pena Loba, na serra entre Calvos de Randín e Os Blancos, é unha das localizacións sinaladas por Greenalia para instalar un polígono eólico.

José González, este luns en Ourense no novo centro de coordinación. FOTO Xunta (FILEminimizer)
José González, este luns en Ourense no novo centro de coordinación. | FOTO: Xunta.

NOTICIAS A LIMIA | Concienciación contra incendios en Guillamil (Rairiz) e dúas...
comentarios