A comarca da Limia celebrou o Día Internacional das Mulleres cun encontro organizado pola Asociación de Mulleres Rurais A Carballa en colaboración co Concello de Rairiz de Veiga, unha xornada que combinou convivencia, cultura e reivindicación arredor do papel das mulleres na sociedade.
O acto reuniu a numerosas participantes no CEIP Carlos Cid Arregui de Rairiz de Veiga, onde se desenvolveu un amplo programa de actividades. A xornada comezou cunha recepción e almorzo de benvida, seguida da intervención da presidenta da asociación e da alcaldesa do municipio.
Durante o encontro proxectáronse diferentes reportaxes e vídeos centrados no traballo e na realidade das mulleres, especialmente no ámbito do emprendemento e do medio rural. Ademais, desenvolveuse unha mesa de mulleres baixo o título “Conversas entre nós”, na que se compartiron experiencias e reflexións sobre os retos e avances na igualdade.
A programación tamén incluíu a representación teatral “Os marcos”, a lectura do manifesto conmemorativo do 8M e un acto reivindicativo que puxo en valor a importancia das mulleres na sostibilidade social e económica do territorio.
A xornada rematou cun xantar de convivencia e baile, acompañados pola actuación dun grupo de gaiteiros e gaiteiras de Rairiz, nun ambiente de celebración e unión arredor dunha data clave para seguir reivindicando a igualdade real entre mulleres e homes.
FOTOS: Noelia Caseiro.
