A cabalgata de Reis de Xinzo encheu as rúas de maxia grazas á ledicia dos máis cativos, que agardaron con toda a ilusión para poder ver a Melchor, Gaspar e Baltasar. Pero antes diso, a alcaldesa, Elvira Lama, deulles a benvida na Casa Consistorial e cedeulles as chaves dos fogares da Limia, para que podan chegar a todos e deixar os agasallos.
O percorrido comezou na rúa Curros Enríquez, ao carón da Praza Carlos Casares, e arrincou coa música da Agupación Musical da Limia. Tras eles, unhas figuras inchables de cores, patinadores e zancudos abrían camiño para o paso da carroza de Melchor. Entre a súa e a de Baltasar, a banda de música tradicional puxo o seu toque na cabalgata ao son de gaita. Antes da chegada de Gaspar, unha charanga amenizaba o paso.
Durante toda a cabalgata, que rematou na Praza Maior, moitos nenos amosaron a súa ledicia por ver aos Reis Magos e moito máis por poder apañar algunha lambetada. Ademais diso, no camiño houbo unha parada. Os maiores da residencia Santa Mariña recibiron a visita dos Reis Magos.
A Agrupación Musical da Limia abriu a cabalgata. | FOTOS: Noelia Caseiro.
Nas rúas, nenos e maiores agardaban pola chegada dos Reis Magos.
Melchor saudou aos cativos dende a súa carroza.
O son das gaitas non faltou nesta cita.
Baltasar vixou nunha carroza decorada cunha gran estrela.
A ledicia dos nenos reflexábase nas súas caras.
Gaspar foi o últimos dos reis en percorrer as rúas de Xinzo.
Os maiores da residencia Santa Mariña agardaron pola parada das súas Maxestades de Oriente.
Os Reis Magos baixaron das súas carrozas para saudar aos usuarios da residencia.
Os Reis Magos chegaron á Praza Maior, ateigada de nenos que querían falar con eles.
