O delegado territorial da Xunta en Ourense, Manuel Pardo, desprazouse esta mañá a Xinzo de Limia acompañado do alcalde, Amador Díaz, para visitar o establecemento Panadería Xinzo S.L., unha das oito empresas ourensás beneficiarias do Bono Remuda.
Este programa, impulsado pola Consellería de Emprego, Comercio e Emigración, contou na convocatoria de 2025 cun investimento de máis de 130.000 euros na provincia de Ourense co obxectivo de facilitar o relevo xeracional entre persoas autónomas e evitar o peche de negocios viables.
Durante a visita, Manuel Pardo lembrou que Panadería Xinzo S.L. recibiu unha axuda de 12.600 euros ao abeiro desta iniciativa. Ademais, sinalou que permanece aberta unha nova convocatoria destas achegas ata o 30 de setembro ou ata o esgotamento do crédito dispoñible, fixado en 1,5 millóns de euros.
Segundo explicou, o programa busca impedir o cesamento de actividades por falta de continuidade xeracional e, ao mesmo tempo, ofrecer oportunidades a persoas interesadas en emprender mediante a adquisición dun negocio xa en funcionamento e economicamente viable.
O delegado territorial detallou que esta orde está dirixida a persoas traballadoras autónomas, profesionais dadas de alta no RETA ou noutros réximes especiais por conta propia, mutualistas e sociedades de calquera clase.
A iniciativa estrutúrase en dúas liñas de actuación. A primeira é o Bono Remuda Rural, destinado a concellos de menos de 10.000 habitantes. A segunda é o Bono Remuda Xeral, para municipios de 10.000 habitantes ou máis.
Nos dous casos subvenciónase o prezo, sen IVE, establecido no contrato de remuda dun negocio ou actividade previamente inscrito na bolsa de remuda da Rede de Polos de Emprendemento. Na Liña 1, a achega alcanza o 75 % do importe do contrato, mentres que na Liña 2 chega ao 70 %.
O Bono Remuda forma parte dunha orde única para persoas autónomas que abrangue cinco programas. Entre eles figuran a medida de promoción do emprego autónomo, dotada con 28,9 millóns de euros; o Bono Nova Oportunidade, con 1,5 millóns; o Bono Autónomo, con 8 millóns de euros; e os incentivos á conciliación familiar, cunha contía de 750.000 euros.
