Cortes de tráfico na N-525 de Xinzo do 30 de maio ao 5 de xuño

O Concello de Xinzo de Limia fixo pública a planificación dos cortes de tráfico que afectarán á travesía da N-525 durante os próximos días, como consecuencia dos traballos de execución de aglomerado impreso e asfaltado que se están a desenvolver na localidade.

Segundo o comunicado municipal, as afectacións comezarán este sábado 30 de maio e prolongaranse ata o venres 5 de xuño, distribuídas en dúas fases diferenciadas.

Durante a fin de semana do 30 e 31 de maio, o corte afectará ao tramo á altura da Praza Maior, onde se levarán a cabo as tarefas de execución de aglomerado impreso.

A partir do luns 1 de xuño e ata o venres 5 de xuño, os cortes ampliaranse a dous puntos da vía. Por unha banda, pechaase a Plataforma Elevada do Pombal para rematar os traballos de aglomerado impreso pendentes. Por outra, cortarase o tramo comprendido entre a rotonda do Pombal e a rotonda da A-52 co obxectivo de completar o asfaltado aínda por executar nese sector.

O Concello dirixiuse á cidadanía para solicitar que planifiquen os seus desprazamentos con antelación e que respecten en todo momento a sinalización provisional instalada nas vías afectadas. A institución municipal agradece a colaboración e comprensión da veciñanza ante as molestias que estas actuacións poidan ocasionar.