A Deputación destina 750.000 euros para as residencias de Baltar, Calvos e Xunqueira | NOTICIAS XINZO
A Deputación de Ourense alcanzará neste mandato a cifra histórica de 102,5 millóns de euros de financiamento directo ás entidades locais da provincia. O goberno provincial, presidido por Luis Menor, presentará o vindeiro mércores dúas novas modificacións de crédito que permitirán distribuír máis de 20,2 millóns de euros con cargo ao remanente de tesourería do exercicio anterior. Esta mobilización de recursos inclúe partidas fundamentais para a comarca da Limia, centradas na mellora da atención social, o apoio á cultura e a reparación de infraestruturas municipais.
Dentro do expediente de cooperación cos concellos, que suma un total de 12,8 millóns de euros, destacan os 750.000 euros destinados ao cofinanciamento de obras en residencias para maiores e centros de día. Esta partida beneficiará directamente aos municipios de Baltar e Calvos de Randín, en colaboración coa Xunta de Galicia, reforzando a rede de coidados para a terceira idade na zona sur. Así mesmo, o documento prevé financiar preto de 300 actuacións municipais relacionadas co saneamento, o abastecemento e o arranxo de camiños rurais danados polos temporais e os incendios forestais.
No ámbito cultural e educativo, a Deputación de Ourense confirmou unha axuda específica de 50.000 euros para o Concello de Xinzo de Limia, dirixida ao mantemento do seu conservatorio de música. Esta achega forma parte dun fondo global de 250.000 euros que se distribúe entre os cinco municipios da provincia que contan con este servizo docente. Coas modificacións de crédito presentadas, o goberno provincial mobiliza un total de 48,1 millóns de euros na primeira metade do ano 2026, priorizando o apoio directo ás demandas formuladas polos alcaldes e os colectivos sociais da comarca da Limia.