O Inorde completa a segunda etapa da ruta pola Vía da Prata entre Verín e Xinzo con visita ao MUGAE | NOTICIAS OURENSE

Preto de 40 persoas participaron este domingo na segunda das catro etapas do ciclo de andainas pola Vía da Prata promovido pola Deputación de Ourense a través do Inorde, completando un percorrido de 34,8 quilómetros entre Verín e Xinzo de Limia. O traxecto, catalogado como de dificultade media-alta, ofreceu a posibilidade de realizarse de forma completa ou dividida en dúas seccións de 21,5 e 13,2 quilómetros.

Ao longo da xornada, os sendeiristas atravesaron enclaves de notable valor patrimonial como o Castelo de Monterrei e o val de Albarellos, antes de alcanzar o alto das Estibadas e descender ata Xinzo de Limia. Á chegada á localidade limiana, os participantes tiveron a oportunidade de coñecer as instalacións do Museo Galego do Entroido (Mugae), onde recibiron unha charla introdutoria sobre a tradición dos entroidos galegos.

A iniciativa enmárcase no proxecto transfronteirizo Camiño Vertical, cofinanciado polo Programa Interreg VI-A España-Portugal (POCTEP) 2021-2027 da Unión Europea, cun obxectivo estratéxico de potenciar o turismo sustentable e dinamizar a economía rural a través do patrimonio histórico e natural da provincia.

O programa, que se estende ao longo de catro etapas e máis de 90 quilómetros entre a fronteira de Feces de Abaixo e a cidade de Ourense, conta con servizo de guías especializados e transporte en autobús gratuíto para os participantes. A terceira etapa está prevista para o domingo 14 de xuño, con saída desde Xinzo de Limia e chegada a Allariz tras percorrer 20,8 quilómetros pola chaira da Limia e a antiga canle da Lagoa de Antela. As persoas interesadas en participar poden inscribirse en www.conocegalicia.es ou chamando ao 988 253 359.