AXENDA | O poema "Raíz de pereira" gaña o III Certame Literario Antón Tovar do Museo da Limia

O poema "Raíz de pereira", de María Carmen Gómez García, foi o gañador do III Certame Literario Antón Tovar, convocado polo Padroado do Museo da Limia. O xurado, integrado por Luis Á. Pousa, Carmen Penim, Cándido Paniagua, Mirian Opazo e Xoan Jardón, acordou o premio por unanimidade.

María Carmen Gómez García, natural de San Paio (Ventosela-Ribadavia), é profesora xubilada de Lingua Galega e Literatura que exerceu a docencia durante 32 anos no IES Lagoa de Antela de Xinzo de Limia. Durante a súa estadía na comarca da Limia, participou activamente en proxectos relacionados coa lingua galega e o patrimonio inmaterial, centrados en lendas e toponimia. Foi gañadora do Certame Internacional de Poesía en Lingua Galega Rosalía de Castro de Cornellà na edición de 2025.

O acto de entrega do galardón celebrarase o sábado 20 de xuño, ás 19:30 horas, no Museo da Limia, en Vilar de Santos. A autora lerá a obra premiada durante a cerimonia, na que tamén participarán alumnas e alumnos do CEIP Carlos Cid Arregui, de Rairiz de Veiga, coa recitación de poemas do autor limiao. Delfín Caseiro, presidente do Padroado e responsable da antoloxía de Tovar publicada por Xerais en 2023, fará unha breve semblanza da vida e obra do poeta da Pereira. O acompañamento musical correrá a cargo do grupo Trovare, que ten musicados varios poemas do autor.

O premio está dotado con 600 euros e inclúe a publicación da obra gañadora na revista Tempos Novos.

A Xunta Directiva do Padroado e o xurado do certame reiteran a demanda de que a Real Academia Galega (RAG) lle dedique o Día das Letras Galegas de 2027 ao poeta limiao Antón Tovar, e animan a institucións e entidades a sumarse á proposta. O Museo da Limia vén promovendo desde 2021, centenario do nacemento do autor, diversas iniciativas para difundir a súa obra e impulsar esta candidatura, incluída a entrega dun expediente con varios centos de sinaturas na sede da RAG en 2022.