AXENDA | Carlin organiza unha xornada de innovación, tendencias e mostras para o profesorado

A preparación do vindeiro curso escolar ten xa o seu punto de encontro oficial en Xinzo de Limia coa celebración da I Feira Escolar de Papelería. Esta xornada técnica de dinamización e formación, organizada de xeito conxunto por Carlin Xinzo e Carlin Verín, en estreita colaboración con Xpazo, Atrave e Expo Familia, celebrarase o vindeiro mércores, 10 de xuño de 2026, en horario de 15:00 a 20:00 horas, no espazo Xpazo de Xinzo de Limia, situado na Rúa Curros Enríquez, 26. A entrada é totalmente de balde pero está pensada e dirixida especificamente para o colectivo de docentes e profesionais do ensino.

A feira concíbese como un salón profesional onde se reunirán os principais stands de provedores nacionais de papelería e material escolar para presentar as últimas novidades, recursos didácticos innovadores e ferramentas deseñadas para facilitar o día a día nas aulas. Entre as marcas líderes que se darán cita atópanse firmas de referencia como Alpino, Carioca, Pilot, APLI, Jovi, BIC, Faber-Castell, Milan, Maped ou Staedtler. Os docentes que se acheguen poderán recoller mostras gratuítas para probar nos seus centros educativos e recibir consellos profesionais sobre técnicas e tendencias creativas de cara á planificación do novo ano lectivo.