AXENDA | Víctor F. Freixanes recibe en Xinzo o Premio Carlos Casares

O Concello de Xinzo de Limia organiza este venres, 23 de xaneiro, o acto de entrega dos Premios de Xornalismo Carlos Casares 2025, que nesta edición recaen no recoñecido escritor e xornalista Víctor F. Freixanes. O acto oficial terá lugar ás 20:30 horas, na Igrexa Vella de Santa Mariña.

Este galardón salienta o xornalismo literario como unha disciplina que afonda na realidade e transcende o ámbito estritamente literario, estendéndose a campos como a política, a pintura, o fútbol ou os costumes da xente. O xurado destacou en Freixanes a orixinalidade e eficacia narrativa, propias de textos nos que “falar dunha cousa leva a outras” e que buscan a complicidade do lector a través dunha reflexión discreta.

O fallo correspondeu a un xurado de cinco membros: Carlos Gómez Salgado, en representación do Concello de Xinzo, como presidente; Carlos Xavier Ares Pérez, da Fundación Carlos Casares; a escritora Stella Estrada; e Pilar Cernuda, gañadora da anterior edición. Actuou como secretario, con voz pero sen voto, Gustavo A. Garrido García, da Fundación Carlos Casares. O Concello de Xinzo convida á veciñanza a participar nun acto que pon en valor a vixencia dun xornalismo de calidade e o compromiso coa cultura galega.