AXENDA | Encontro de sabores e culturas en Xinzo

A Casa da Cultura de Xinzo acollerá este sábado, 12 de xullo, unha nova actividade intercultural aberta ao público baixo o título “Sabor e Tradición”, cunha programación pensada para fomentar o encontro entre culturas a través da gastronomía e a expresión artística.

A partir das 20:00 horas, as persoas asistentes poderán gozar dunha degustación de pratos típicos de Venezuela e Marrocos, países convidados nesta edición. A cita incluirá tamén proxeccións audiovisuais e presentacións culturais que permitirán coñecer máis de preto a historia, os costumes e a diversidade destes dous pobos.

Con entrada libre e acceso gratuíto, esta xornada supón unha oportunidade única para celebrar a diversidade e fortalecer os lazos de convivencia entre comunidades.

O evento está organizado pola Asociación Abriendo Caminos coa colaboración do Concello de Xinzo de Limia e forma parte da programación de verán centrada en ofrecer espazos inclusivos, culturais e participativos.