AXENDA | Xinzo inaugura o venres a exposición "Love Velo" para conmemorar o aniversario da toma do Santa María

O Concello de Xinzo de Limia acolle este venres o inicio dun programa cultural conmemorativo do aniversario da histórica toma do transatlántico Santa María en 1961, unha acción vangardista de oposición antifascista liderada polo Directorio Revolucionario Ibérico de Liberación (DRIL) e ideada polo intelectual galego Xosé Velo.

O programa arrancará coa inauguración oficial da exposición "Love Velo" o venres 12 de xuño ás 19:00 horas no Salón de Plenos do Concello de Xinzo de Limia. A mostra, que combina fotografía e documentación, reivindica a dimensión humana, política e creativa desta figura clave da historia galega e poderá visitarse na Casa da Cultura de Xinzo ata o 25 de xullo.

A programación completarase precisamente o sábado 25 de xullo, Día de Galicia, coa prestrea do documental "Expediente Xosé Velo". O programa está organizado polo Concello de Xinzo coa colaboración de Acude Rural e Arraianos Producións.