AXENDA | O Partido Popular de Ourense debaterá este sábado sobre o problema da vivenda

A Biblioteca Municipal de Xinzo de Limia acollerá este sábado 13 de decembro, ás 10:00 horas, unha xornada informativa centrada na situación da vivenda en Galicia, organizada polo Partido Popular da Provincia de Ourense. O encontro pretende analizar a problemática actual, os retos de acceso a un fogar e as medidas que se están a activar para facer fronte a esta realidade.

O acto será presentado por Benito Iglesias Padrón, coordinador da Área de Vivenda e Urbanismo do PP de Ourense. A primeira das intervencións chegará ás 10:15 horas da man de Sonia Ogando Vázquez, quen exporá cuestións relacionadas co dereito á vivenda, a inseguridade xurídica e o contexto que afecta a propietarios e inquilinos.

Ás 10:30 horas será a quenda de Pilar Fernández León, tamén da Área de Vivenda e Urbanismo, que detallará as axudas e medidas dispoñibles na Comunidade Autónoma de Galicia para facilitar o acceso á vivenda, especialmente destinadas a familias, mocidade e colectivos con maiores dificultades.

A clausura comezará ás 10:50 horas con dúas intervencións: a de Cristina Campero Dorado, presidenta da xestora local do PP en Xinzo de Limia, e a de Luis Menor Pérez, presidente do Partido Popular de Ourense, que pecharán unha xornada enfocada a achegar información e alternativas ao ámbito da vivenda.