NOTICIAS A LIMIA | 180 tractores clamarán polo futuro da Limia mañá en Xinzo
Para as 11:30 horas de mañá gandeiros e agricultores están convocados a concentrarse no Toural, en Xinzo, desde onde partirá unha tractorada de protesta na que a Limia volverá clamar polo seu futuro. Hai 180 vehículos anotados a menos de 24 horas do inicio da marcha. Virán desde todos os puntos da comarca.
Os organizadores, os mesmos que convocaron a manifestación do martes na praza Carlos Casares (Adegal, FRUGA, Sindicato Labrego Galego, Unións Agrarias e a Asociación de Produtores de Pataca da Limia), reclaman que muden as políticas do Goberno central e de Europa.
O percorrido será duns 10 quilómetros. Desde O Toural, os tractores circularán polo centro de Xinzo a través da avenida de Ourense até tomar a estrada de Vilar de Barrio. Despois, xirarán cara a Morgade e regresarán a Xinzo entrando por Baronzás e rúa San Sebastián até avenida de Madrid. Á altura do Bar Mundial, na mesma avenida, está previsto que a veciñanza que se queira manifestar acompañe aos vehículos de volta ao Toural.
A organización tiña previsto completar o percorrido nunha hora, mais dada o número de tractores é posíbel que a marcha dure algo máis.
"Non houbo resposta de ningún goberno desde o martes [o día da concentración na Carlos Casares]", explicou este xoves ao Diario do Limia Amador Díaz, presidente e portavoz da asociación de pataqueiros. "Agora, o que faremos é levar as reivindicacións por escrito aos plenos de todos os concellos para que as distintas corporacións as apoien". Tamén agradeceu a adhesión das comerciantes de Xinzo.
Nun comunicado enviado aos asociados de ProLimia, a directiva convidou aos comerciantes "a pechar os nosos comercios o día 25 de marzo ó paso da tractorada. Tamén, a acompañalos andando detrás deles no traxecto que van facer". Concha Conde, presidenta do colectivo, indicou esta mañá que as demandas de agricultoras e gandeiras contan "con todo o noso apoio como asociación, porque son ademais os nosos clientes".
Varios comercios de Xinzo anunciaron hoxe en redes sociais a súa intención de pechar mañá durante a tractorada, e o cartel da convocatoria circulou profusamente. Os hostaleiros, no seu propio debate interno sobre a posibilidade de convocar finalmente un peche do sector o próximo luns, tamén manifestaron a súa adhesión á mobilización de agricultores e gandeiros.
"Nós en vinte días estaremos sementando patacas cun custe de produción un 40% máis elevado. E non sabemos como as imos vender nin como estará o mercado nin como lles repercutirá aos consumidores", di Amador Díaz. "Chegará un punto no que se fará moi complicado seguir asumindo eses custes que estamos a soportar no gasóleo, na luz, nos fertilizantes".