Venres. 09.12.2022
Inspirouse na súa aldea, Escornabois, en Trasmiras

NOTICIAS A LIMIA | A limiá Mirian Opazo recibe un premio pola súa curta sobre despoamento

Mirian Opazo, premiada no certame Xuventude Crea na categoría de Videocreación.
Mirian Opazo, premiada no certame Xuventude Crea na categoría de Videocreación.

Os premios Xuventude Crea recoñeceu ós gañadores na categoría de Videocreación, onde a limiá Mirian Opazo quedou en segundo lugar. A creadora de 24 anos recibiu o premio pola súa curta "Retratos do silencio", inspirada na súa aldea materna, Escornabois, en Trasmiras. "É unha pequena curta que fala do despoboamento do rural e do seu abandono, aínda que a min gústame dicir que trata de habitar ausencias", sinala.

Opazo quedou segunda neste certame ao que se presentaron máis de 4.000 persoas de entre 16 e 30 anos. Na categoría Videocreación, nove creadores foron finalistas e a limiá quedou por diante da viguesa Rocío Campoy, con "Emocións en espiral"; e por detrás do gondomareño Juan Rodríguez e o seu traballo "Corpo, Espazo e Tempo".

A moza limiá escolleu a o tema do despoboamento "pola miña historia persoal coa aldea, que saíu máis dunha preocupación política que de algo artístico", sinala. Con esa premisa gravou a curta, que a presentou nunha asignatura da súa carreira de Belas Artes que estudou en Salamanca e que utilizou para presentarse aos premios Xuventude Crea, "no último momento", engade.

A principios da semana pasada, Opazo recibiu un "sorprendente" correo electrónico por parte da Xunta, no que lle confirmaban que era unha das finalistas. "Non o esperaba porque non tiña claro nin se lles chegara o vídeo porque foi todo no último momento", recorda. Así presentou esta fin de semana Centro Galego de Artes da Imaxe, na Coruña, onde se deron a coñecer aos premiados.

Este segundo posto trae consigo un premio de 1.500 euros. "Isto é coma unha palmadiña nas costas, un recoñecemento de que estás a facer ben o teu traballo", resalta.

NOTICIAS A LIMIA | A limiá Mirian Opazo recibe un premio pola súa curta sobre despoamento
comentarios