Luns. 05.12.2022
A Escola Rural de Saúde espera completar ao redor de 100 probas en seis concellos da comarca

NOTICIAS A LIMIA | A campaña de control da osteoporose remata en Porqueira e Sandiás

Lola Rico da Escola Rural de Saúde na Casa da Cultura campaña de control da osteoporose
Lola Rico, da Escola Rural de Saúde, na Casa da Cultura de Xinzo, durante a campaña de control da osteoporose. FOTO: Noelia Caseiro.

A campaña de control da osteoporose impulsada pola Escola Rural de Saúde chega á última semana con dúas citas hoxe en Porqueira (na Casa do Concello na Foxa ás 16:00 horas) e en Sandiás (na Casa da Cultura, ás 18:30 horas). Para anotarse á charla en Porqueira é necesario chamar ao teléfono 988 46 61 02. No caso de Sandiás, o teléfono para se inscribir é o 988 46 50 01.


A campaña comezou ou 20 de xuño na Boullosa (Baltar), coa participación de 20 veciñas e veciños de entre 61 e 89 anos de idade. O mércores pasado, en Xinzo, realizáronse a proba 37 persoas de entre 50 e 96 anos. Ese mesmo día, o equipo de profesionais estivo en Arnuíde (Vilar de Barrio) e en Sarreaus. 


“A osteoporose é unha enfermidade silenciosa de perda de densidade ósea, que aumenta coa idade e que volve os osos máis fráxiles, sendo a principal causa das fracturas de cadeiras nas persoas maiores”, informan desde a Escola Rural de Saúde.


Nestas charlas, ofrécese información sobre alimentación e hábitos saudables, formación para a prevención e, ademais, realízanse probas de medición por ultrasón da densidade ósea do calcaño. Para a realización da proba é preciso aportar os datos de altura e peso.


O equipo de profesionais está formado polo farmacéutico e Máster en nutrición Pablo García Vivanco, a enfermeira Elisa Cadaya, a psicóloga Rosa Trujillo e a responsábel da  Escola Rural de Saúde, Lola Rico. Ao remate desta campaña, esperan ter realizado ao redor dunhas 100 probas entre os seis concellos.

NOTICIAS A LIMIA | A campaña de control da osteoporose remata en Porqueira e Sandiás
comentarios