lunes. 15.07.2024

Un cento de regantes asociados na comunidade de Corno do Monte reuníronse onte na Casa da Cultura de Xinzo de Limia nunha asemblea na que se ía decidir a fusión coas outras tres comunidades -San Salvador de Porqueira, Lamas-Ganade e Alta Limia- que se han de beneficiar do plan de regadío que afectará a unhas 3.000 hectáreas e dentro do cal se empezaron a acometer xa as obras para algún dos máis de 30 pozos previstos nun proxecto que superará os 23 millóns de euros e que non empezará a funcionar antes do 2026.


A asemblea tiña que cambiar os estatutos para adaptarse as directrices que establece a Sociedad Estatal de Infraestructuras Agrarias (SEIASA), dependente do Ministerio de Agricultura, Pesca y Alimentación, para este tipo de proxectos. E tamén renovar a directiva, actualizar as cotas dos regantes e decidir sobre os termos da fusión. Os estatutos estarán en exposición pública polo prazo dun mes. E a directiva renovouse mantendo a Amador Saburido como presidente. Eses foron os acordos principais.


Mais non se chegou a un acordo a respecto da actualización das cotas. E a asemblea tampouco avanzou decisión ningunha sobre a fusión. En calquera caso, esta é unha condición que pon o SEIASA, que financia o plan de regadío. Amador Saburido explicou hoxe ao Diario do Limia que a fusión será debatida nunha próxima asemblea unha vez que se cumpran os prazos para aprobar definitivamente os estatutos.


Aínda que os prazos dados polo Ministerio eran máis curtos e para o mes de agosto as comunidades deberían ter avanzado na fusión, o certo é que os regantes non se meten présa con esta cuestión. Outras comunidades solicitaron unha ampliación do prazo e nas próximas semanas irán resolvendo o trámite, advirten fontes do sector da pataca. Sobre a mesa aínda está a ampliación da superficie do futuro regadío.


Onte, á entrada do salón de actos da Casa da Cultura, Amador Saburido expuxo un mapa coas máis de mil parcelas susceptíbeis de se sumar ao regadío. Despois de rexistrarse para a asemblea, os regantes detíñanse a considerar os detalles do mapa. A primeira estimación que se ofreceu desde a Administración sobre o investimento que deberán realizar os propietarios para entrar no futuro regadío era de 3.000 euros por hectárea. A Consellería de Medio Rural asegurou nunha reunión en abril en Xinzo que estaba a traballar na procura dun financiamento privado en boas condicións.    


Mentres tanto, as comunidades seguen incrementando o número de hectáreas que se adhiren ao plan. Das 2.500 iniciais (cifra de abril) a Consellería de Medio Rural afirmou que tratará de chegar até as 4.000 que están na zona de regadío. “É rendíbel, e haberá xente que queira alugar e traballar esas parcelas, porque 4.000 hectáreas de regadío son un luxo hoxe en día en España”, manifestou o conselleiro de Medio Rural, José González naquela reunión con regantes das catro comunidades o pasado abril. 

Asemblea Corno do Monte. Regantes. Xullo. Amador Saburido, presidente
Amador Saburido, no centro, foi reelixido presidente da comunidade de Corno do Monte.

E mentres os regantes de Corno do Monte e das outras comunidades van amodo nos trámites, as obras para perforar e construír os pozos xa comezaron nalgún dos polígonos de parcelas agrícolas. O plan está en marcha. As comunidades, máis activas que nunca. O regadío vai supoñer unha transformación enorme nas prácticas na zona. Pero aínda vai tardar, así que a seca é un problema que respostas perentorias a estas alturas.  


Por outra banda, os pataqueiros confesan que ningunha das Administracións públicas ás que apelaron na manifestación de hai quince días en Ourense deron aínda resposta. Despois da seca, a lista de cuestión urxentes é longa.

Asemblea Corno do Monte. Regantes. Xullo. Amador Saburido, presidente 3
Mapa que se expuxo onte antes da asemblea.

NOTICIAS A LIMIA | Os regantes non se meten présa coa fusión das catro comunidades