O PSdeG-PSOE de Ourense puxo en valor as axudas directas destinadas a facilitar a compra de fertilizantes, que na provincia alcanzan os 508.183,86 euros para 391 agricultores e agricultoras. A primeira relación de beneficiarios contempla unha superficie total de 10.715,80 hectáreas.
Das terras incluídas nesta primeira relación, 8.916,89 hectáreas corresponden a cultivos de secaño, que recibirán un total de 341.784,43 euros, mentres que as 1.798,91 hectáreas de regadío contarán con 166.399,43 euros en axudas.
No conxunto de Galicia, esta primeira relación alcanza os 3.299 beneficiarios, mentres que no ámbito estatal serán 249.376 agricultores e agricultoras os que perciban un total de 494,57 millóns de euros.
O senador do PSdeG-PSOE de Ourense, Rafa Villarino, puxo en valor «o compromiso do Goberno de España co sector primario, especialmente nun momento no que os custos de produción están a poñer unha enorme presión sobre as explotacións agrarias».
Villarino sinalou que son máis de medio millón de euros destinados directamente a 391 explotacións da provincia de Ourense, e destacou que as axudas permitirán afrontar o custo dun insumo fundamental para garantir a produción agrícola.
O senador socialista subliñou tamén que, segundo o seu criterio, o obxectivo da medida é evitar que o incremento do prezo dos fertilizantes recaia sobre as explotacións e posteriormente sobre o prezo dos alimentos, mantendo ao mesmo tempo uns niveis adecuados de fertilización e os volumes de produción.
Estas axudas extraordinarias están recollidas no artigo 50 do Real Decreto-lei 7/2026, do 20 de marzo, do Plan Integral de Resposta á Crise de Oriente Medio, aprobado polo Goberno de España. O programa contempla unha subvención global de 700 millóns de euros para facilitar a compra de fertilizantes ante o forte incremento do seu prezo.
As persoas beneficiarias poderán percibir ata 92,50 euros por hectárea nos cultivos de regadío e ata 38,33 euros por hectárea nos de secaño.
Villarino afirmou que «o sector agrario ourensán sabe que non está só» e puxo como exemplo estas axudas, que, segundo o senador socialista, permiten responder a unha situación extraordinaria provocada polo encarecemento dunha materia prima esencial para a actividade agrícola.
Desde o PSdeG-PSOE, Villarino defendeu que as administracións deben apoiar aos produtores cando se producen situacións que comprometen a súa rendibilidade. O senador considerou ademais que a agricultura e a gandaría son sectores estratéxicos para Ourense.
O Ministerio de Agricultura, Pesca e Alimentación publicará proximamente unha segunda relación de potenciais beneficiarios, polo que o número final de agricultores e agricultoras ourensáns que poderán acceder ás axudas poderá incrementarse.
A primeira listaxe de beneficiarios permite xa consultar as contías correspondentes a través da páxina web do Fondo Español de Garantía Agraria (FEGA).
Villarino concluíu destacando que o Goberno de España mobiliza 700 millóns de euros para apoiar directamente aos agricultores fronte á suba extraordinaria dos fertilizantes e mostrou a súa expectativa de que a segunda relación permita que máis explotacións da provincia poidan beneficiarse da medida.
