O BNG de Baltar critica a falta de resposta do alcalde ante unha avaría que leva tres días deixando ao pobo sen auga

O Grupo Municipal do BNG de Baltar vén de solicitar formalmente información ao Concello ante a interrupción do subministro de auga potable que, segundo trasladou a propia veciñanza, se prolonga xa desde hai tres días e afecta tanto a particulares como a establecementos de hostalaría e servizos esenciais como o centro de saúde e o centro de día.

A portavoz municipal do BNG, Silvia Piñar Flores, considera que a situación require unha resposta máis áxil e eficaz por parte do goberno local, especialmente tendo en conta as elevadas temperaturas destes días e a importancia dun servizo básico como é o abastecemento de auga.

Segundo as explicacións trasladadas polo alcalde, varios operarios están realizando traballos manualmente para tratar de localizar a fuga. Desde o BNG aseguran respectar plenamente o labor destes traballadores, pero consideran que, dadas as circunstancias, o Concello debería valorar a utilización de medios técnicos especializados que permitan localizar a avaría con maior rapidez e eviten someter os operarios a traballos físicos extremos en plena vaga de calor.

“Estamos falando dun servizo esencial e dunha incidencia que xa se prolonga varios días. A prioridade debe ser localizar a avaría e restablecer o subministro o antes posible, empregando todos os medios dispoñibles”, sinala Silvia Piñar.

O BNG pide medidas alternativas mentres non se restableza o servizo

No escrito presentado este 19 de agosto, o BNG solicita ao Concello que informe por escrito sobre as causas concretas que provocaron a interrupción, as actuacións previstas para solucionar a avaría e as medidas que se van adoptar no caso de que o subministro non poida recuperarse de maneira inmediata.

Entre esas medidas, a formación nacionalista propón valorar alternativas como o reparto de auga ou a utilización de cisternas para a recarga de depósitos, co obxectivo de garantir o abastecemento aos puntos máis afectados e, de maneira especial, aos servizos indispensables.

O BNG tamén reclama coñecer cal foi o protocolo de comunicación empregado polo Concello para informar á veciñanza e aos distintos servizos afectados. “Nunha situación destas características é fundamental que as persoas saiban que está ocorrendo, canto pode durar a incidencia e que alternativas teñen mentres non se solucione”, apunta Piñar.

A portavoz nacionalista insiste en que a súa prioridade non é buscar responsables no medio dunha avaría, senón conseguir que se mobilicen os recursos necesarios e que exista información clara e constante.

“Queremos unha solución rápida, medios adecuados e información transparente. Non é razoable que unha parte da veciñanza leve varios días sen auga sen coñecer con claridade cando se vai recuperar o servizo nin que medidas alternativas está a habilitar o Concello”, conclúe Silvia Piñar.