Luns. 05.12.2022
Tamén haberá dúas charlas sobre a historia do Couto Mixto

NOTICIAS A LIMIA | O Couto Mixtour organiza unha mesa redonda para paliar o despoboamento rural

Cartel da Conferencia do Couto Mixto. | FOTO: Couto Mixto.
Cartel da Conferencia do Couto Mixto. | FOTO: Couto Mixto.

A asociación do Couto Mixtour organiza para este vindeiro sábado día 20 de novembro unha conferencia con dúas charlas e unha mesa redonda na que se tratarán a historia da antiga rexión e diversas propostas para o paliamento do despoboamento rural. O programa iniciarase ás 12:30 horas no Couto Mixtour, situado na Rúa Os Pereiros, 2, en Meaus, Concello de Baltar.

A primeira das intervencións correrá a cargo de Cesáreo González, presidente da Asociación Veciñal do Couto Mixto e representante das tres vilas -Meaus, Santiago e Rubiás- que formaran parte do territorio do Couto Mixto. A súa charla xirará arredor da historia deste territorio independizado de España e Portugal na antigüidade.

Media hora despois, sobre a 13:00 do mediodía, será o turno do escritor e Xuíz de Horna do Couto Mixto, Antón Riveiro Coello. O invitado tamén falará sobre a rexión do Couto e a súa historia, e nomeará diversos libros e escritos que traten ou se relacionen co tema -entre outros puntos- .

Ao rematar as dúas primeiras intervencións, sobre as 14:00 horas, os asistentes á conferencia poderán desfrutar dun delicioso xantar no restaurante Chaves do Couto. O menú incluirá pinchos, un prato principal a escoller, pan, bebida, postre e café.

Finalmente, levarase a cabo unha mesa redonda aberta á participación de todos os convidados. Nela debatiranse diversas propostas para dar a coñecer a historia do Couto Mixto e intercambiaranse suxerencias e recomendacións para aumentar a poboación na zona. A loita contra o despoboamento rural segue a ser un tema preocupante, pois en Meaus conviven só 22 veciños.

Para asistir ao programa deberase reservar praza chamando ao 696 62 39 60, ou escribindo ao correo de [email protected] O prezo é de 25 euros por persoa, no que se incluirán todas as actividades, incluído o menú.

NOTICIAS A LIMIA | O Couto Mixtour organiza unha mesa redonda para paliar o...
comentarios