A sede coruñesa do PSdeG-PSOE acollerá mañá sábado unha xornada de formación para cadros das Xuventudes Socialistas e simpatizantes, no marco da Escola de Formación de Verán que o partido organiza no país. Entre os convidados a impartir esa formación está o limiao Iván Olmos Ferreiro (Ourense, 1994), graduado en Comunicación Audiovisual pola USC e cun mestrado MBA ademais da súa experiencia como asesor e candidato en procesos electorais recentes.
“Estarei con Isa Martínez, na xornada de tarde. Eu non son militante socialista, Isa si, mais agradezo o convite como experto en comunicación política. E esperamos desenvolver un taller dunhas catro horas de duración, con xogos de rol e simulacións. Do que se trata é de mostrar algunhas ferramentas aos cadros para enfrontarse a unha entrevista xornalística, a unha rolda de prensa, a un mitin ou mesmo a unha intervención nun pleno”, explica Iván Olmos.
Baixo o título de Municipalismo e Sociedade, na xornada intervirán entre outras as alcaldesas da Coruña, Inés Rey, e Lugo, Laura Méndez, e xunto a elas, a alcaldesa de Xinzo, Elvira Lama. Despois da apertura, as alcaldesas socialistas (cinco son as convocadas) conversarán cos militantes sobre feminismo na xestión municipal.
![Iván Olmos Ferreiro. Consultor en comunicación política (1)](/media/diariodolimia/images/2022/09/02/2022090218162313164.jpg)
Iván Olmos, que no 2015 participou como asesor (e candidato no número 8 da lista) de Xinzo Adiante nos comicios municipais nos que a formación conseguiu tres actas e no 2019 foi candidato ao Congreso por Ourense con En Marea, coincidirá na sesión de tarde cun dos pesos pesados na comunicación dentro da estrutura socialista en Galicia: José Manuel Lage, na actualidade concelleiro na Coruña e un dos asesores do secretario xeral do PSdeG, Valentín González.