Ao redor dun cento de tractores procedentes de distintos puntos da comarca da Limia bloquearon o parque do Toural, en Xinzo de Limia, como primeira acción de protesta dos agricultores limiáns tras as mobilizacións rexistradas na cidade de Ourense. A concentración provocou o corte dos accesos en todos os sentidos e xerou afeccións ao tráfico na zona.
A mobilización trasladou á comarca as mesmas reivindicacións defendidas nas protestas da capital ourensá. Os agricultores denuncian a falta de rendibilidade das explotacións, coa venda de produtos por debaixo dos custos de produción, o incremento dos gastos derivados da enerxía, dos fertilizantes e dos carburantes, así como unha carga burocrática que consideran excesiva.
Outro dos eixos da protesta é a demanda de controis máis estritos sobre as importacións procedentes de países terceiros, que, segundo o sector, non cumpren cos mesmos requisitos ambientais e sanitarios que se esixen aos produtores locais, o que, segundo os convocantes, xera unha competencia desleal.
Os participantes sinalaron que a concentración no parque do Toural supón un primeiro paso para visibilizar o malestar do campo limián e advertiron de que non descartan novas accións se non se producen respostas concretas por parte das administracións.
