O Concello de Xinzo e a Asociación do Sector Primario de Galicia veñen de despexar calquera dúbida sobre os recentes cambios na programación do Petardazo. Nunha xuntanza mantida esta mañá entre o alcalde, Amador Díaz, o tenente de alcalde, Antonio Fernández, e o representante agrario Javier Losada, quedou claro que as modificacións obedecen exclusivamente a criterios técnicos de seguridade e ao cumprimento do Plan de Autoprotección, desvinculándoas de calquera conflito coas protestas polo Mercosur.
A imposibilidade de que a AXEGA desprace o seu Posto de Mando Avanzado debido á alerta meteorolóxica nas estradas foi o factor determinante para suspender os actos masivos. Ningunha das partes tivo intención de alterar a esencia da festa; o sector primario recalcou que o seu obxectivo nunca foi boicotear o Entroido, mentres que o goberno local reiterou o seu total respecto polas reivindicacións dos gandeiros e agricultores, que consideran unha cuestión independente á normativa de seguridade.
Como proba de boa vontade e compromiso coa vila, os produtores retirarán os seus tractores a media tarde de hoxe. Para manter viva a súa reclamación contra o acordo co Mercosur, permanecerá un único vehículo de xeito simbólico no centro da praza. Esta medida permite despexar os espazos necesarios para garantir a mobilidade e a protección dos asistentes durante o resto do ciclo festivo, demostrando que a convivencia entre a festa e a reivindicación social é posible en Xinzo.
