Medio Rural suspende as queimas de particulares en toda Galicia desde este mércores | NOTICIAS XINZO

A Consellería do Medio Rural anunciou este martes a adopción dunha medida preventiva de urxencia: a suspensión temporal das queimas de restos agrícolas e forestais realizadas por particulares en toda Galicia. Esta prohibición entrará en vigor este mércores, 25 de marzo, e manterase activa ata novo aviso. A decisión implica que non se tramitarán novas autorizacións e que todos os permisos que xa foran concedidos pola administración perden a súa validez dende a xornada de mañá.

Segundo informou a administración autonómica, a medida tomouse tras avaliar polo miúdo a evolución meteorolóxica e os diferentes indicadores técnicos que inciden directamente no risco de incendio. A normativa vixente establece que o uso do lume debe quedar restrinxido cando as condicións climáticas poden dificultar o seu control. Quedan excluídas desta suspensión as queimas prescritas e controladas que executa o Servizo de Prevención e Defensa contra os Incendios Forestais (SPIF), as cales contan con planificación previa e medios de extinción profesionais.

Dende a Xunta de Galicia faise un chamamento á cidadanía para que extreme as precaucións no rural e colabore na denuncia de calquera actividade delituosa incendiaria. O goberno galego lembra que o uso do lume para actividades agrícolas ou forestais por parte de particulares está totalmente prohibido mentres dure esta alerta. Así mesmo, recoméndase á veciñanza ter sempre a man o número de teléfono gratuíto 085, ao que se debe chamar de xeito inmediato en caso de detectar calquera sinal de lume no monte.