Sábado. 04.02.2023
Continuará como Secretario xeral en Ourense e promete gobernar a Deputación e a cidade

NOTICIAS A LIMIA | Ampla vitoria de Rafael Villarino, que tamén gañou en Xinzo, nas primarias do PSOE

vilar
Rafael Vilariño, co seu equipo, este domingo pola mañá en Ourense na estatua de Pablo Iglesias. | FOTO: PSOE

O ex alcalde de Amoeiro e líder da oposición en Ourense, Rafael Villarino [e non Villariño, como por erro do redactor apareceu na primeira edición de madrugada], de 56 anos, continuará como Secretario xeral dos socialistas ourensáns despois de gañar as eleccións cunha marxe de case 200 votos fronte a Alfredo García, actual alcalde de O Barco de Valdeorras.

A participación foi do 79% dos afiliados do PSdeG-PSOE na provincia. Votaron 1.239 dos 1.560 militantes.Villarino recibiu 709 apoios fronte aos 516 de García. “A militancia apoia o modelo de partido destes últimos catro anos, un modelo que nos levou a conseguir que o PP perdese a maioría absoluta na cidade e na Deputación, e o único que nos impide gobernar é ese pacto que todos coñecemos”, dixo o vencedor nunha rolda de prensa case a media noite.

Villarino, que no 2017 se impuxera a Noela Blanco, mantivo os seus apoios na cidade onde sumou 330 votos por 240 de García, e na maioría das cabeceiras de comarca, especialmente no Ribeiro (conseguiu 103 votos no Carballiño e Ribadavia fronte aos 43 do seu rival). Tamén se impuxo claramente en Verín, Xinzo e Celanova. Mentres García gañaba no Barco, na Rúa e Trives.

En Xinzo, praza que os candidatos visitaron a fin de semana pasada, Rafael Villarino alcanzou 33 votos. Na rolda de prensa, prometeu “unir o partido para que sexa imparábel [o seu lema de campaña]" e prometeu gobernar a cidade e a Deputación tralas eleccións de maio do ano próximo.

“Non temos nada que dicir. As compañeiras e os compañeiros falaron e dixeron que lles gusta como esta o partido. Non temos nada que dicir. Perdemos claramente. A vida segue, o partido segue e esperemos que estas primarias sexan para ben”, recoñeceu Alfredo García na súa intervención diante dos medios.

NOTICIAS A LIMIA | Ampla vitoria de Rafael Villarino, que tamén gañou en Xinzo, nas...
comentarios