Luns. 05.12.2022
Hai un total de 22 novas altas nas escolas

NOTICIAS A LIMIA | Iníciase o curso escolar nos colexios de Xinzo cuns 800 matriculados

Visita da alcaldesa de Xinzo, Elvira Lama, ao CEIP Rosalía de Castro.
Visita da alcaldesa de Xinzo, Elvira Lama, ao CEIP Rosalía de Castro.

O curso escolar 2021 - 2022 arrancaba este xoves día nove nos dous colexios de educación infantil e primaria de Xinzo -o CEIP Rosalía de Castro e o CEIP Carlos Casares- . Un inicio de clases que voltou a verse afectado outro ano máis polas medidas anti - covid requeridas.

A alcaldesa de Xinzo, Elvira Lama, realizou esta mañá unha visita aos dous centros co obxectivo de transmitirlle ao equipo directivo e profesorado o apoio do concello. Durante a súa estancia emitiu unha mensaxe de apoio aos mestes e mestras para que afrontaran de xeito positivo outro ano escolar marcado pola pandemia. "Estamos seguros que coa rutina e os protocolos aprendidos este curso será máis doado para todos e todas".

A política tamén destacou os traballos de melloras que relizara o concello durante o verán nas instalacións educativas, por exemplo, o arranxo do muro perimetral do Rosalía de Castro e a construcción dun almacén -necesario ante a falta de espazo- no Carlos Casares.

Calcúlase que hai uns 800 alumnos matriculados en total sumando os dous colexios. No Rosalía de Castro están inscritos 390 estudantes -dos cales 14 son novas altas- que serán repartidos en 20 aulas. No Carlos Casares rexistráronse 392 escolares -sendo oito as novas matriculacións- para distribuír en 19 clases.

A maiores, o concello informa de que aínda queda prazas dispoñibles para os alumnos que precisen do servicio de madrugadores, as cales son xestionadas pola ANPA.

NOTICIAS A LIMIA | Iníciase o curso escolar nos colexios de Xinzo cuns 800 matriculados
comentarios