12 de octubre de 2021, 10:20
Ás 23:45 da medionoite deste luns, un particular avisaba ao servizo de emerxencias 112 do avistamento de lume na zona vella do Concello de Xinzo de Limia.
Ao parecer, o fogo iniciárase no falso teito dunha vivenda particular localizada na praza de Oriente, moi preto do coñecido Bar Lulo. Sospéitase de que o incendio comezara por mor das lapas dunha cheminea que quedara sen apagar.
Afortunadamente puidéronse apagar rapidamente as lapas propagadas sen causar case ningún dano material. Non houbo ningún ferido.
Ata o lugar do suceso trasladáronse os Bombeiros do Consorcio Provincial do Parque da Limia, a Garda Civil, Protección Civil e os servizos de emerxencia.
