NOTICIAS XINZO | A Universidade de Santiago de Compostela achégase a Xinzo con formación para maiores

Xinzo de Limia converterase este mes de maio nunha extensión da Universidade de Santiago de Compostela (USC) grazas ao seu Programa Universitario de Maiores. A Casa da Cultura da vila será o escenario de tres sesións formativas gratuítas e abertas a persoas maiores de 50 anos, dentro do IV Ciclo desta iniciativa.

O obxectivo deste programa é achegar o coñecemento universitario a un público sénior, fomentando a aprendizaxe continua e a participación activa. As tres charlas, que se desenvolverán os sábados pola mañá (de 10:00 a 13:00 horas), contarán con relatores de prestixio da USC e abordarán temas diversos e atractivos. Esta iniciativa, que facilita o acceso ao coñecemento e á cultura, conta co apoio da Xunta de Galicia e dos concellos de Xinzo de Limia e Verín, nunha colaboración enriquecedora coa Universidade de Santiago de Compostela. 

Programa de actividades

A primeira cita será o 10 de maio con Katia Cino Rouco, investigadora da USC, que nos levará de viaxe pola "Historia da fotografía: unha viaxe desde a cámara escura ata a era dixital". O 24 de maio, será a quenda de Ánxela Gracián, profesora do Programa Universitario de Maiores e escritora, que impartirá un obradoiro de "Escritura creativa". Para rematar o ciclo, o 31 de maio, Blanca Fraga Cimadevila, colaboradora do programa da USC, achegaranos ao fascinante mundo das "Especies arbóreas na nosa terra".

As persoas interesadas en participar nestas sesións formativas poderán matricularse de xeito totalmente gratuíto na propia Casa da Cultura de Xinzo de Limia (en horario de 9:00 a 14:00 e de 15:30 a 20:30 horas) ou a través do correo electrónico casaculturadexinzodelimia@gmail.com.