Sábado. 04.02.2023
A Agrupación Musical da Limia quedou terceira na súa categoría

NOTICIAS XINZO | A Chikiband gaña o Certame Galego de Bandas de Música na sección infantil

Actuación da Chikiband no Certame Galego de Bandas de Música.
Actuación da Chikiband de Agrupación Musical da Limia, no Certame Galego de Bandas de Música.

O Certame Galego de Bandas de Música celebrouse esta fin de semana en Celanova, acadando a súa 15ª edición e volvendo tras un parón obrigado pola pandemia. O evento congregou a oito formacións e a preto de 400 músicos, con presenza limiá coa participación da Agrupación Musical da Limia, que se presentou na Sección Terceira; e coa Chikiband, que o fixo na Sección Infantil.

Os cativos da Chikiband conseguiron o mellor resultado, ao gañar na súa categoría e quedar por diante da Banda de Música Infantil de Rubiós. Os rapaces recibiron 526 puntos por parte do xurado trala súa interpretación dunha peza obrigatoria, "A lenda de Breogán"; e o pasodobre "A pastoriza" baixo a dirección de José Luis Tielas.

A Agrupación Musical da Limia, á que tamén partence a Chikiband, obtivo un bo resultado na Sección Terceira para as formacións adultas. A gañadora foi a Banda de Música de Santádega, en segundo posto quedou a Banda de música municipal de Caldas de Reis e o podio completouno a Agrupación Musical da Limia, cun terceiro lugar.

Cada un dos premiados recibiu unha dotación económica, que superou os 6.000 euros no seu conxunto. O certame organizouno a Federación Galega de Bandas de Música Populares.

NOTICIAS XINZO | A Chikiband gaña o Certame Galego de Bandas de Música na sección infantil
comentarios