Non deixa de ser unha chiscada do destino que o pulpeiro de maior sona da contorna limiá e de boa parte da provincia decidise marchar un día de feira en Verín. Facelo un 14 ou un 27 tería marcado para sempre o calendario da vila que o viu nacer; quizais por iso José Carrera Santana, "Pucho", escolleu este xoves 11 de decembro para despedirse, falecendo na cidade de Vigo apenas uns días despois de cumprir os 80 anos o pasado sábado.
Nin a ficción de Eduardo Manostijeras tería a destreza real que Pucho amosaba diante do pote. As súas mans, as mesmas que presidían o corte do cefalópodo con precisión cirúrxica, deron de comer a milleiros de persoas entre cuncas de viño e anacos de pan, converténdose no símbolo vivente dun oficio que na súa familia transcende cinco xeracións. Pero se a súa habilidade coas tesouras era lendaria, máis o era o seu carácter: ninguén lembra velo sen sorrir, nin sequera cando a cola diante do seu posto sumaba trescentos comensais agardando. A súa calma e o seu trato no "ti a ti" eran o ingrediente secreto que ningún outro puido copiar.
Máis alá da gastronomía, Pucho foi un arquitecto da alegría. Non está claro se gozaba máis cociñando ou vivindo o Entroido de Xinzo, unha faceta na que tamén triunfaba como deseñador e participante activo, sendo un clásico imprescindible nesas datas. Era memoria colectiva e testemuño vivo da historia da Limia, percorrendo dende neno as feiras da comarca e converténdose nun embaixador polo que moitos viaxaban quilómetros só para probar o seu produto.
A súa marcha deixa un baleiro imposible de encher para as súas fillas, que o acompañaron durante décadas nesta aventura, así como para amigos e clientes. Este sábado non sabemos se haberá pulpo na feira antelá, pero se o hai, a vila ten a certeza de que non saberá igual. Nunca volverá saber igual.
Os seus restos mortais serán velados, dende as 10:00 horas deste venres, no velatorio do "Polígono", ata as 17:30 horas, momento no que partirán cara a Igrexa de Santa Mariña para as oportunas honras fúnebres.
Esta redación envía o seu máis sentido pésame a todos os seus familiares e amigos, de xeito moi agarimoso e especial á súa viúva Manola, e ás súas fillas Alejandra e María Dolores.
D.E.P.
