Xinzo convoca o II Concurso de Fotografía do Entroido baixo o lema "Tradición, Respecto e Sentimento"

O Concello de Xinzo de Limia, a través da concellería de Cultura e Turismo, organiza a segunda edición do concurso de fotografía do Entroido baixo o lema "Tradición, Respecto e Sentimento". O obxectivo principal do certame é capturar imaxes que reflictan estes tres principios na vila durante todo o ciclo do Entroido 2026.

O prazo para presentar as obras permanecerá aberto desde o 23 de xaneiro ata o 1 de marzo de 2026. Os participantes poderán enviar un máximo de dúas fotografías, xa sexa en cor ou branco e negro, que non superen os 10 MB. Como requisito fundamental para garantir a autenticidade das capturas, as bases especifican que non se poderá utilizar a intelixencia artificial nas imaxes.

O certame repartirá diversos galardóns, incluíndo un primeiro premio de 300 euros e dous accésits de 100 euros, todos acompañados dun bono de Prolimia. Ademais, outorgaranse tres premios especiais de 100 euros doados por Diario do Limia, a Asociación A Pantalla e o Dende a Limia. Os interesados en participar deben remitir as súas fotos e o formulario ao correo culturadexinzo@gmail.com.

Podes consultar as bases completas AQUÍ.