Xinzo de Limia conta dende este mércores con máis espazo para medrar. A Xunta de Galicia anunciou o remate das obras de urbanización da ampliación do parque empresarial, unha actuación estratéxica que supuxo un investimento superior aos 7,5 millóns de euros.
Grazas a estes traballos, o polígono incrementa a súa superficie nun 40%, sumando 117.418 metros cadrados e poñendo á disposición de empresas e emprendedores un total de 23 novas parcelas. Esta ampliación era unha demanda histórica do tecido empresarial da comarca, xa que o parque actual, con 90 parcelas ocupadas, esgotara por completo o seu solo dispoñible.
Con todo, para que as máquinas poidan entrar a construír naves, falta un último paso administrativo. Xestur solicitou xa ao Concello de Xinzo que aprobe a acta de recepción das obras. Unha vez o goberno local formalice este trámite, as parcelas adquirirán a condición oficial de solar e os propietarios poderán solicitar as correspondentes licenzas de obra e actividade.
Esta actuación enmárcase na estratexia autonómica para dotar á provincia de Ourense de 2,6 millóns de m² de novo solo industrial, con proxectos tamén en marcha no Carballiño-Maside, Paderne de Allariz, O Pereiro de Aguiar e San Cibrao das Viñas.
