Xinzo de Limia prepárase para vivir un Nadal diferente, deseñado para encher de vida tanto as rúas da vila como os centros sociais das aldeas. O Concello vén de presentar unha programación cultural que destaca pola súa ambición e, sobre todo, polo seu carácter social: desde o 13 de decembro ata o 6 de xaneiro, a veciñanza poderá gozar dunha axenda de primeiro nivel na que toda a programación será de acceso gratuíto.

Unha decisión que, tal e como salienta o alcalde, Amador Díaz, busca "que ninguén quede na casa nestas datas", apostando por un Nadal "de reencontros, de ilusión e, ante todo, para todas as familias sen excepción". Pola súa banda, o concelleiro de Cultura, Carlos Gómez, pon en valor o "salto de calidade" deste ano, asegurando que se logrou "un equilibrio perfecto entre os grandes espectáculos mediáticos e a necesaria dinamización cultural das nosas parroquias cunha programación das mellores de Galicia, á altura das grandes cidades".

Tradición e recoñecemento ao talento local

Máis alá das grandes novidades, o Nadal en Xinzo mantén viva a súa esencia máis tradicional e o recoñecemento ao esforzo dos veciños. A programación recupera citas imprescindibles no calendario local como a Gala da Cultura e a Gala do Deporte, dúas xornadas deseñadas para poñer en valor e premiar o talento artístico e deportivo da vila. Así mesmo, a maxia máis clásica ten as súas datas marcadas en vermello para a infancia: a tradicional recepción de Papá Noel na Praza Maior e a gran Cabalgata de Reis, garantes da ilusión que nunca pode faltar nestas datas.

Unha aposta firme polo lecer familiar e os grandes musicais

Unha das xoias da coroa desta programación será o musical oficial de Tadeo Jones: "A Táboa Esmeralda", que aterra na Casa da Cultura o 3 de xaneiro. Trátase dunha produción de gran formato, avalada por Mediaset, que sitúa a Xinzo no circuíto dos grandes espectáculos. A oferta infantil complétase co regreso do imprescindible Limialandia, que transformará o pavillón de deportes nun gran parque de xogos do 31 de decembro ao 6 de xaneiro, xunto con propostas como "Os Bolechas" ou o musical "A Maxia dos Contos".

Música: do Gospel internacional ao orgullo da Banda

No apartado musical, o público poderá vibrar coa espectacularidade do coro Black Light Gospel Choir con Rebeca Rods e coa nostalxia do pop grazas ao tributo a La Oreja de Van Gogh e á banda de versións En Mala Hora. Porén, o momento máis emotivo será o 28 de decembro co 20º aniversario da Agrupación Musical da Limia, que celebrará dúas décadas de historia cunha gala especial acompañada polo solista Antonio Barros, un evento clave para entender a saúde cultural da vila.

Unha axenda diaria: rúa, formación e cultura

A programación complétase cunha actividade continua que mantén o pulso da vila. Haberá espazo para a formación con diversos obradoiros na Casa da Cultura e para a creatividade local coa actuacións das Escolas de Gaitas e Danzón. A cultura máis intimista chegará da man do concerto de Emilio Rúa e Carlos Caneiro e da exposición "Destino" de Manuel Valcárcel. Ademais, o ambiente festivo tomará a rúa con citas como o aniversario da Charanga Achicoria ou as divertidas Prebadaladas do 31 de decembro.

Nadal nos Pobos: vertebrar o territorio

Fuxindo de centralizar toda a actividade no casco urbano, o Concello activa un ano máis a iniciativa "Nadal nos Pobos". Durante varias xornadas de decembro, a maxia das festas percorrerá o rural levando música, teatro e agasallos a un total de 11 localidades, incluíndo Baronzás, Morgade ou Piñeira Seca, entre outras. O obxectivo é que o espírito do Nadal chegue a cada recuncho do municipio.

PROGRAMACIÓN COMPLETA DÍA A DÍA

● 13 dec (Sábado):

• Inicio oficial da programación de Nadal en Xinzo.

• Aniversario da Charanga Achicoria | 19:00 h | Praza Maior.

● 18 dec (Xoves):

• Apertura da exposición "Destino: unha peregrinación" de Manuel Valcárcel (ata o 16 de xaneiro) | Casa da Cultura.

• Concerto de Emilio Rúa & Carlos Caneiro ("Cánticos de Luz e Nadal") | 20:00 h | Igrexa Vella.

● 19 dec (Venres):

• Festival da Escola de Gaitas & Percusión | 20:00 h | Auditorio Ángel Cocho.

● 20 dec (Sábado):

• Nadal nos Pobos: Baronzás (12:00), Morgade (16:00), San Pedro (17:45), Laroá (18:15).

• Obradoiro de Figuriñas de Nadal | 12:00 h | Casa da Cultura.

• Obradoiro de Crochet | 16:00 h | Aula 1 Casa da Cultura.

• Gala de Nadal da Escola Danzón | 17:00 h | Auditorio Ángel Cocho.

● 21 dec (Domingo):

• Concerto de Gospel con Rebeca Rods & Black Light Gospel Choir | 12:00 h | Igrexa Nova.

● 22 dec (Luns):

• Nadal nos Pobos: Rebordecha (12:00), Boado (13:00), Mosteiro (17:15), Ganade (18:15).

• Os Bolechas: "Lamberetadas de Nadal" | 19:00 h | Auditorio Ángel Cocho.

● 23 dec (Martes):

• Nadal nos Pobos: Gudín (16:00), Parada de Ribeira (17:15), Piñeira Seca.

• Tributo a La Oreja de Van Gogh ("Cuéntame al oído") | 20:00 h | Auditorio Ángel Cocho.

● 24 dec (Mércores):

• Recepción de Papá Noel | 17:00 h | Praza Maior.

Fin de Ano: Galas, Tradición e Festa

● 26 dec (Venres):

• Visita a Pazolandia (pola mañá).

• Obradoiro de Feltro | 12:00 h | Casa da Cultura.

• Gala da Cultura | 20:00 h | Auditorio Ángel Cocho.

● 27 dec (Sábado):

• Torneo Solidario (durante o día) | Pavillón de deportes.

• Obradoiro de Crochet | 16:00 h | Aula 1 Casa da Cultura.

• Obradoiro de Baile Tradicional con Artur Puga + Concerto Enxebres de San Lázaro | 18:00 h | Casa da Cultura.

● 28 dec (Domingo):

• Torneo Solidario (durante o día) | Pavillón de deportes.

• Gala do 20º Aniversario da Agrupación Musical da Limia con Antonio Barros | 20:00 h | Igrexa Nova.

● 29 dec (Luns):

• Musical Infantil "A Maxia dos Contos" | 18:00 h | Auditorio Ángel Cocho.

• Gala do Deporte | 20:00 h | Pavillón de deportes.

● 30 dec (Martes):

• Levántate e baila: Concerto de En Mala Hora | 20:00 h | Auditorio Ángel Cocho.

● 31 dec (Mércores):

• Prebadaladas coa charanga | 12:00 h | Adro da Igrexa Vella.

Ano Novo e Reis: O Gran Final

● 31 dec - 6 xan:

• Limialandia | Pavillón de deportes.

● 2 xan (Venres):

• Obradoiro de Cartas aos Reis Magos | 12:00 h | Casa da Cultura.

● 3 xan (Sábado):

• Musical Infantil: Tadeo Jones e a Táboa Esmeralda | 18:30 h | Auditorio Ángel Cocho.

● 4 xan (Domingo):

• "Sen máis": Concerto da Banda de Gaitas & Percusión | 18:30 h | Auditorio Ángel Cocho.

● 5 xan (Luns):

• Cabalgata e Recepción dos Reis de Oriente | 17:00 h | Saída da Praza Carlos Casares.

• Concerto de Los Chamachuelos | 20:00 h | Praza Maior.

• Discomóbil Apocalipsis | 00:00 h | Praza Maior.