Sábado. 04.02.2023
Este mércores e o xoves celebraranse en Xinzo

O Centro de Desenvolvemento Agrogandeiro participa nunhas xornadas sobre a produción da pataca

Servando Álvarez Pousa, responsable do Centro de Desenvolvemento Agrogandeiro do Inorde en Xinzo, participa nas charlas en Coristanco.
Servando Álvarez Pousa, responsable do Centro de Desenvolvemento Agrogandeiro do Inorde en Xinzo, participa nas charlas en Coristanco.

O responsable do Centro de Desenvolvemento Agrogandeiro do Inorde de Xinzo, Servando Álvarez Pousa, participa nunhas xornadas sobre melloras nas técnicas da produción da pataca que se están a celebrar en Coristanco. Alí, Álvarez Pousa leva a cabo charlas con recomendacións sobre a optimización dos sistemas de plantación e sobre a realización dun plan de fertilización da pataca.

Estas xornadas, que rematan hoxe en Coristaco para mañá e o xoves celebrarse en Xinzo, teñen por obxectivo reflexionar sobre as técnicas de cultivo da pataca a través do intercambio de coñecementos entre Galicia e zonas produtoras da Bretaña Francesa. A iniciativa tamén pretende establecer liñas estratéxicas para a implementación de técnicas de cultivo que optimicen os rendementos e primen a conservación dos solos.

O seminario chegará mañá á Casa da Cultura de Xinzo, onde se celebrará ata o xoves. O técnico bretón Philippe Dolo, de Bretagne Plants, impartirá estas xornadas xunto con outros da consellería para achegar aos asistentes técnicas que melloren a produción da pataca en temas como os labores de preparación do solo e as necesarias rotacións de cultivo. Ademais, os agricultores limiaos poderán intercambiar experiencias cos bretóns.

 

Para participar é preciso unha inscrición previa que se pode tramitar en liña aquí. Tamén están dispoñibles os números de teléfono 981 654 637, da Fundación Juana de Vega; e o 616 764 805, da Asociación de Empresarios, Gandeiros e Agricultores da Limia (Adegal).

A Consellería de Medio Rural impulsa esta actividade en Xinzo coa colaboración da Fundación Juana de Vega, Adegal e EFA Fonteboa e está deseñada principalmente para os pataqueiros, aínda que tamén pode ser de interese para estudante ou técnicos comerciais, entre outros.

O Centro de Desenvolvemento Agrogandeiro participa nunhas xornadas sobre a produción da...
comentarios