Domingo. 03.07.2022
O acto, con aforo restrinxido dado o estado da vivenda, celebrarase este sábado

NOTICIAS A LIMIA | Familiares de Antón Tovar convocan unha homenaxe ao poeta na súa casa da Pereira

aNTON TOVAR. FAMILIARES CON BALTAR
Os sobriño de Antón Tovar, nunha entrevista recente co presidente da Deputación. | FOTO: Deputación Provincial.

“Co gallo de conmemorar o 18 cabodano de Antón Tovar Bobillo, o vindeiro sábado [18 de xuño] ás 11:00 horas, celebrarase un acto na súa lembranza, na súa casa natal da Pereira, en Rairiz de Veiga”, informaron os familiares do poeta limiao, falecido o 15 de xuño de 2004, nunha nota de prensa esta noite.


O acto, indican, consistirá en lembrar a obra do autor a través das voces de escritoras e escritores vivos. Proxectaranse mensaxes audiovisuais e recitaranse poemas dedicados ou relacionados coa propia casa. Ademais, o cantautor valdeorrés Anxo Rei interpretará coa súa guitarra algúns dos poemas de Tovar que musicou no disco A rabela da pluma.


Será un acto con aforo restrinxido porque o estado actual da casa non permite abrila ao público por razóns de seguridade, advirten os organizadores. 


E engaden: “Esta é a razón de que só convidásemos ás e ós representantes políticos da provincia de Ourense. Agardamos contar coa asistencia das/dos portavoces dos grupos políticos da Deputación, amais do seu presidente, coa alcaldesa de Rairiz de Veiga, cos voceiros dos grupos municipais e cun representante do Museo da Limia”.


Haberá unha visita guiada á vivenda, de máis de 200 anos de antigüidade, espazo que a familia de Tovar propuxo para albergar unha residencia literaria que levaría o nome de Antón Tovar. A familia espera coñecer en breve se a Deputación ou o concello aceptan a proposta de cesión.


O acto servirá ademais para reclamar a dedicatoria ao poeta limiao do Día das Letras Galegas 2023.

NOTICIAS A LIMIA | Familiares de Antón Tovar convocan unha homenaxe ao poeta na súa...
comentarios