O BNG reclama que non se autorice o parque eólico Cantanarrás en Rairiz | NOTICIAS XINZO

O BNG da Arnoia-A Limia reclama á Xunta de Galiza que non autorice o Parque Eólico Cantanarrás nin as súas infraestruturas de evacuación, ao considerar que o proxecto pode provocar impactos sobre o territorio, a biodiversidade, a paisaxe e o patrimonio da comarca.

A formación nacionalista sinala que o parque se sitúa nun emprazamento no que xa existira o Parque Eólico Fonsanta, proxecto para o que, segundo o BNG, a Xunta emitiu unha Declaración de Impacto Ambiental desfavorable.

O Bloque cuestiona tamén a avaliación dos efectos acumulativos e sinérxicos que Cantanarrás podería producir xunto cos parques eólicos e outras infraestruturas enerxéticas existentes ou previstas na Limia e na Baixa Limia.

O proxecto afecta directamente ao Concello de Rairiz de Veiga, onde está prevista a instalación de cinco aeroxeradores. O BNG considera que a infraestrutura implicaría unha transformación permanente da paisaxe e podería afectar elementos do patrimonio natural e cultural, incluída a súa incidencia visual desde o Camiño da Prata.

Silvia Piñar, membro da Plataforma STOP Eólicos e concelleira do BNG no Concello de Baltar, advertiu sobre o impacto territorial do proxecto. “Non estamos falando só de cinco aeroxeradores en Rairiz de Veiga, senón dun novo proxecto que se suma a unha presión eólica cada vez maior sobre A Limia e a Baixa Limia”, afirmou.

Piñar engadiu que, segundo a formación, os concellos están acumulando infraestruturas enerxéticas sen unha análise suficiente dos seus efectos sobre a paisaxe, o patrimonio e a poboación residente.

O BNG defende tamén a necesidade dunha moratoria eólica mentres a Xunta continúa coa elaboración do novo Plan Eólico de Galiza e define as novas Zonas de Aproveitamento Eólico.

Marcos Nogueiras, responsable comarcal do BNG Arnoia-A Limia, considera que non debería continuar a autorización de novos proxectos mentres se deseña o modelo eólico que deberá ordenar o territorio nos próximos anos. A formación reclama que a planificación futura teña en conta os territorios que xa soportan unha elevada concentración de infraestruturas enerxéticas.

O BNG pide finalmente á Xunta de Galiza que non autorice o Parque Eólico Cantanarrás e que priorice, segundo a súa posición, a protección do territorio, a paisaxe, o patrimonio e os valores naturais da comarca.