A Deputación destina case 100.000 euros para vivenda social en Vilar de Santos, Porqueira e Calvos | NOTICIAS XINZO
A Xunta de Goberno da Deputación de Ourense, presidida por Luis Menor, vén de aprobar a resolución do Plan Provincial de Vivenda, unha estratexia dotada con 500.000 euros para o conxunto da provincia. No caso da comarca da Limia e a súa contorna de influencia, a administración provincial confirmou inxeccións económicas directas para os concellos de Vilar de Santos, Porqueira e Calvos de Randín. O obxectivo destes fondos é facilitar a adquisición, rehabilitación e mellora de inmobles destinados ao alugueiro residencial.
En canto á repartición específica destas axudas, os municipios de Vilar de Santos e Calvos de Randín recibirán unha contía de 40.000 euros cada un, mentres que ao concello de Porqueira se lle asignan 19.600 euros. A institución provincial activou esta iniciativa no ano 2025 mediante un acordo plenario unánime coa meta prioritaria de garantir o acceso á vivenda nas contornas rurais e frear de xeito efectivo o despoboamento.
Para dar continuidade a esta liña de actuación e potenciar a dinamización demográfica, o goberno provincial aprobou recentemente unha modificación de crédito por importe de 1,2 millóns de euros, o que supón máis do dobre dos recursos destinados no exercicio anterior. Con este plan estrutural, a Deputación de Ourense consolida unha ferramenta indispensable para ofrecer oportunidades habitacionais reais e asentar poboación no territorio limián e nas demais comarcas da provincia.