O cuestionario dunha enquisa sobre violencia de xénero que lanzou o Concello de Xinzo (e que xa non está accesíbel na rede) propuña unha pregunta aberta sobre os lugares que a veciñanza sente como inseguros. Na resposta das veciñas e veciños indícanse tres zonas: o Toural, o paseo xunto ao río e o polígono.
A enquisa fai parte da fase de elaboración do Plan de Igualdade e os resultados presentáronse hoxe no salón de plenos da Casa do Concello con presenza de representantes do tecido asociativo de Xinzo de Limia e os técnicos do Centro de Información á Muller.
Contra o final do acto, a alcaldesa, Elvira Lama, respondeu á alerta dicindo primeiro que está en marcha a substitución das luminarias públicas para instalar lámpadas LED (“que esperemos que aumenten á potencia da iluminación”) e, despois, que se estudará a posíbel necesidade de mellora da iluminación nas zonas sinaladas.
Foi o primeiro resultado práctico dun plan que arranca cheo de boas intencións e cunha dinámica, na sesión de hoxe, que non se corresponde coa aposta metodolóxica. Cando alguén desde a bancada de convidados lembrou que este non é o primeiro plan de igualdade, a alcaldesa matizou que se trata “do primeiro plan participado”.
Mais a participación dos actores sociais limitouse a responder ao convite. Falar, falaron pouco. Falar, falou Laura Seara, ex secretaria de Estado de Igualdade (PSOE), quen dirixe a empresa Red Talento, consultora con sede en Ourense especializada en plans de igualdade e que ten entre os seus clientes ao Concello de Xinzo.
Seara debullou durante máis dunha hora os datos da enquisa que constitúe o primeiro chanzo da participación no proceso de elaboración do Plan de Igualdade de Xinzo. “Haberá tamén focus group (grupos de discusión)”, dixo ao final para reforzar o carácter cualitativo da investigación que definirá os problemas e as accións do futuro plan.
Falou Laura Seara, ex secretaria de Estado de Igualdade (PSOE), quen dirixe a empresa Red Talento, consultora con sede en Ourense especializada en plans de igualdade e que ten entre os seus clientes ao Concello de Xinzo.
O Concello de Xinzo resumiu nunha nota de prensa eses datos: “participaron máis de 200 veciñas e veciños, a maioría mulleres nadas entre os anos 1969 e 1980. Un 83 % das mulleres e un 60 % dos homes que completaron o cuestionario consideran que elas sofren discriminación, especialmente no ámbito laboral e á hora de acceder a un posto de traballo. O 5 % das mulleres que contestaron, aseguran haber solicitado os servizos que presta en Xinzo o Centro de Información á Muller. Un 24 % das mulleres asegura que sufriu situacións de acoso sexual e abuso sexual no último ano”.
“A finalidade desta primeira parte do Plan pasa por unha potente diagnose de igualdade que mida os indicadores mais importantes, analice os programas e as actuacións, así como os recursos dispoñibles. Nesta fase tamén se despregan as ferramentas participativas para que a cidadanía faga chegar as propostas para o deseño do Plan”, indica o comunicado municipal.
O despregue das ferramentas participativas quedou, nesta primeira reunión, nunha declaración de intencións. As convidadas oficiaron como público. Apenas houbo intervencións. As asociacións viñeron a escoitar. Desde a empresa e desde o Concello díxoselles o que se espera delas: que completen unhas follas con propostas, suxestións, etcétera. A enquisa e Laura Seara, nas referencias ao Ibex-35 e aos dirixentes mundiais que participaron na reunión da OTAN en Madrid, estableceron o primeiro marco no que se moverá o proceso.
Mais que unha oportunidade para descubrir novas formas de loitar contra a discriminación da muller (“neste ámbito, en políticas públicas, está todo inventado”, dixo a consultora), o proceso pode servir para definir os límites da participación individual e colectiva coa que se presenta o Plan, e quizá sirva tamén para outras cousas. Por exemplo, para mellorar a iluminación das rúas ou o ancho das beirarrúas, como suxeriu outra intervención desde o público.
