sábado. 13.07.2024

"O executivo local tratará de buscar, xunto coa Deputación, novas medidas de impulso, empezando por establecer garantías dunha maior estabilidade nos horarios e días de apertura [do Museo do Entroido]", explica nunha nota de prensa este xoves o Concello de Xinzo, dando conta dunha reunión mantida en Compostela coa Dirección Xeral de Patrimonio o pasado día 8 de marzo na que participaron a alcaldesa, Elvira Lama (PSOE), e o concelleiro de Cultura, Ramiro Rodríguez (BNG). 


O que reclamou nesa reunión o goberno de Xinzo e que o Museo do Entroido entre a formar parte da Rede Galega de Museos, dependente da Consellería de Cultura. O Museo, que apenas abriu as súas portas ao público durante cinco días nas últimas semanas do Entroido deste ano, é responsabilidade da Deputación Provincial.


“Nos últimos anos fixéronse parches nas adxudicacións a diferentes empresas para a súa xestión por períodos curtos de tempo”, di Ramiro Rodríguez na comunicación do Concello desta mañá, na que se critica a intermitencia "na súa apertura e atención ao público".


Á Rede Galega de Museos están adscritos 88 museos, coleccións, casas e fundacións. Entre elas, o Museo da Limia, de Vilar de Santos, e os tres museos de Allariz, entre as once institucións ourensás que figuran na lista.  


O Concello de Xinzo anuncia que buscará coa Deputación de Ourense, a quen lle foi cedida a xestión polo anterior goberno local, "fórmulas que garantan estabilidade na súa apertura", mentres inicia os trámites diante da Subdirección Xeral de Arquivos e Museos para a inclusión do espazo na Rede Galega.


"Cómpre destacar que o Servizo de Museos é a unidade administrativa que coordina as actuacións en materia de museos en Galicia e ten responsabilidade sobre o control do patrimonio moble custodiado nos mesmos e sobre as coleccións galegas, tanto nos de titularidade autonómica e estatal xestionados pola Secretaría Xeral de Cultura, como daqueles que constitúen o Sistema Galego de Museos", informa a comunicación municipal.

NOTICIAS A LIMIA | Xinzo pide a colaboración da Xunta para recuperar a actividade do...