Venres. 29.03.2024

“Empecei a pensar en facer o libro en 2016, cando se cumprían 60 anos da lei que deu paso á desecación da Lagoa de Antela. Levoume pouco máis dun ano escribilo. A historia non trata de posicionarse sobre se aquilo foi un feito bo ou un feito malo, senón de ver á xogada, por empregar un termo futbolístico, desde a perspectiva dos animais, que eran os habitantes e os propietarios da lagoa”, dixo Rafael Laso, autor de A revolta da Lagoa, presentado esta tarde na praza Maior de Xinzo no acto central da celebración do Día das Letras.


A alcaldesa, Elvira Lama, que minutos antes acompañou ao Antela na Moreira na fotografía co trofeo de campións de Liga, presentou o acto xunto co concelleiro de Cultura, Ramiro Rodríguez. Tamén estivo o escritor Miguel Anxo Alonso Diz, que debullou a obra de Laso. 


“As historias foron xurdindo en canto empecei a escribir”, manifestou Rafael Laso. “É como cando empezas a arar e vai o arado e o rego segue só”. A novela, contou o autor, ten como fío argumental o debate que se produce entre os animais cando vén a desecación da lagoa. Laso animou aos presentes a coidar o patrimonio cultural e especialmente a lingua galega coa intención de lla transmitir ás xeracións futuras.


A alcaldesa engadiu, retomando o exemplo do impacto da desecación da lago nas vidas (humanas e animais), a necesidade de transmitir tamén a riqueza da biodiversidade. Nun vídeo que puxo o ramo á tarde lembráronse algunhas das aves e das plantas que desapareceron para sempre daquela área por efecto da desecación.

Letras Galegas (28)
Xabier Casares, durante a entrega a unha nena dun dos premios do concurso escolar.

Antes, Xabier Casares, presidente da Fundación Carlos Casares, estivo presente na entrega dos galardóns dos premios Carlos Casares de relato e debuxo para escolares. Na entrega de premios ás rapaces e rapaces tamén participaron membros da corporación municipal, así como Rafael Laso e Miguel Anxo Alonso Diz. 


Desde a mañá, celebrouse a feira do libro do Día das Letras. Dúas librarías abriron as súas portas, unha delas instalou unha carpa na praza Maior. 

NOTICIAS A LIMIA | Letras: conservación e transmisión