Luns. 26.09.2022
A localidade checa foi a última visita da alcaldesa acompañando á banda de gaitas

NOTICIAS XINZO | Elvira Lama quere irmandar Xinzo con Strakonice

Elvira Lama, nunha recepción no concello da cidade de Strakonice. FOTO Concello de Xinzo
Elvira Lama, nunha recepción no concello da cidade de Strakonice. | FOTO: Concello de Xinzo.

A resposta de Elvira Lama ás críticas lanzadas desde o Partido Popular polo uso partidista da viaxe que a alcaldesa realizou acompañando á Banda de Gaitas Xinzo de Limia a un festival internacional de música é propoñer o irmandade de Xinzo con Strakonice, a localidade checa obxecto da visita.

“Establecemos lazos de amizade con esta cidade que permitirán ‘entablar’ intercambios culturais, económicos e un mellor grao de coñecemento de ambos territorios”, pon en boca da alcaldesa o comunicado do Concello de Xinzo emitido este mesmo xoves. 


“Cómpre lembrar que a alcaldesa, Elvira Lama, acompañou aos 39 músicos da agrupación e ao seu director, Fernando Dopico, na súa viaxe de máis de 30 horas en autobús á localidade checa. Alí foron recibidos polo alcalde de Strakonice, Mgr Bretislav Hrdlicka, e iniciáronse as conversacións para que a unión dos dous concellos fose unha realidade que permitise non só o intercambio cultural, senón tamén económico”, sinala a nota de prensa.


En realidade, non hai máis relación entre Strakonice e Xinzo que esta viaxe resultado dun convite á banda de gaitas por parte da organización do festival no que mediou Xosé Luis Foxo, director da Real Banda de Gaitas da Deputación. Elvira Lama sumouse á expedición como representante do Concello de Xinzo. 

“Dende o Concello de Xinzo de Limia preténdese iniciar o expediente de ‘irmanamento’ na máis brevidade que sexa posible, do mesmo xeito que o fará o de Strakonice. Esta unión ofrecerá beneficios en distintos ámbitos para as dúas administracións”, di literalmente a nota de prensa do goberno municipal.


E engade unha breve descrición da cidade: “Strakonice é a ‘localidad-capital’ do distrito de Strakonice, na rexión de Bohemia Merdidional, República Checa. Ten unha poboación que ronda os 23.000 habitantes e atópase no noroeste da rexión, preto da beira do río Moldava, o principal afluente do río Elba e da fronteira coas rexións de Pilsen e Bohemia Central”.


Xinzo de Limia está irmandado coa localidade portuguesa de Ponte de Lima desde 1984. 

NOTICIAS XINZO | Elvira Lama quere irmandar Xinzo con Strakonice
comentarios